الإسم : حميد أوتعزيت Hamid Outiazit
تاريخ الإزدياد : 18 يونيو 1969
الحي : أموگاي – الدشيرة الجهادية
الموقع : مهاجم
حميد أو حميد أغْرْدَا كما هو معروف عند الرياضيين والدشيراويين عامة، ذاك اللقب لي ماجاش غير هاكاك ولكن تلقب ب أغردا أو الفأر حيث كان يراوغ بطريقة سلسة وإلى مشى حتى هرب بلا ماتبعو حيث ماغتشدوش
بدات المسيرة ديالو من فريق الجولان بحي أموكاي لي كانت كاتضم نجوم المدينة ديك الساعة قبل مايلتحق بالفئات ديال أولمبيك الدشيرة لي تدرّج فيها حتى وصل للفريق الأول لي لعب معاه أول مقابلة سنة 1987، التألق ديالو ف الأولمبيك ماخلاهش يطول فيه حيث لعب فيه ثلاث مواسم والتحق من بعد لفريق رجاء أكادير سنة 1990 لي كان ف المجموعة الوطنية الثانية آنذاك،
حميد كانت البنية الجسمانية ديالو مساعداه بشكل كبير، كايعاود ليا واحد السيد من الناس لي جاوروه أنه قبل مايكون العشب فتيران، إلى شد حميد الكرة ف الجناح كيبان ليهوم غير العجاج حتى كايدوز
كان متميز داخل الملعب بالتحركات ديالو، وبالحس التهديفي لي كان عندو وهادشي خلاه يتتوج ب هداف البطولة للموسم 92/93 ، الشيء لي خلاّ العروض تتقاطر عليه من مختلف الأندية المغربية وعلى رأسها الرجاء البيضاوي ، حسنية أكادير ، الفتح الرباطي ، شباب المسيرة ، هو رفض جميع العروض من غير ديال الرجاء البيضاوي لي كان بالنسبة ليه مناسب وتافق معاهوم على أساس يبدا معاهوم شهر يونيو 1994 ، وكان ذاك الخبر هو الذي يتصدّر المشهد وكان حديث الساعة آنذاك لكن الأقدار كان لها رأي آخر بحيث فشهر يناير سنة 1994 غادي يتصاب إصابة خطيرة غيرت مجرى الأحداث ، مع ذلك كانت شباب المسيرة بغات تكلف بالإستشفاء ديالو ومن بعد يلتحق بها ، لكنه فضل يبقى فأكادير حتى يتشافى ، الإصابة خدات ليه أكثر من عامين قبل مايرجع للميادين مرة أخرى مع رجاء أكادير
بعد العودة ديالو ، وبين سنة 1997 و 2004 لعب فيها بعض المواسم مع أولمبيك الدشيرة وحقق معاهوم الصعود للقسم الأول هواة آنذاك ، وقرر باش يختم المسيرة ديالو رفقة فريق رجاء أكادير سنة 2005
حميد أغردا كان هو محبوب الجماهير بامتياز وكانت له شعبية كبيرة بفضل الموهبة ديالو والتواضع ديالو…
حميد شارك كذلك كممثل للمغرب في بطولة العالم للصحة (لي كايشاركو فيها الناس د قطاع الصحة) ثلاث مرات ،الأولى فألمانيا وخدا فيها الهداف ، الثانية ف إسبانيا خدا فيها حتى هي هداف ، والثالثة فكرواتيا…
هادشي كله هو لي خلى حميد يبصم الإسم ديالو في تاريخ الكرة السوسية وميمكنش شي واحد يجبد ذاكرة أولمبيك الدشيرة أو رجاء أكادير أو كرة القدم عامة في سوس بلا مايذكر الإسم ديالو
مناقشة هذا المقال