موقع “كود” يرفض وضع طلبات ترخيص لدى الولاية أو العمالة لممارسة العمل الصحفي ليلا :

الموقع يعتبر وضع طلب ترخيص لدى عامل أو وال “شوهة وإهانة كبيرة” ويدعو الصحافيين الى الاتحاد ضد هيمنة وزارة الداخلية ويتساءل:

لماذا تصلح بطاقة الصحافة؟ ولماذا لا نلغي الحكومة ونعطي كل شيء الى وزارة الداخلية؟

وهذا نص المقال الذي نشره موقع كود لمالكه الصحافي أحمد نجيم:

علاش ما نلغيوش الحكومة كلها ونعطيوها للداخلية وللقياد. كيفاش الصحافيين المهنيين خاصهم طلب للعمالة وها علاش كود ما غادية تقدم طلب حتى لشي والي او عامل

كود هناء ابو علي

الداخلية عوض ما دير خدمتها مركزة هاد ليام باش دير كمامة للصحافيين. ولى وزير الداخلية اكثر من رئيس الحكومة. كيدير ما بغى. كيضرب الدستور. كيضرب حرية الصحافة. المجلس الوطني لحقوق الانسان ساكت ووزارة حقوق الانسان غايبة وفيدرالية الناشرين ماشي فهاد العالم والمجلس الوطني للصحافة حشمان.

لفتيت باغي يدير كمامة للصحافيين. للصحافة. نور الدين مفتاح مدير نشر “الايام” والرئيس السابق لفيدرالية الناشرين لخص هاد الشي فتدوينة بعد بيان العار اللي خرج من الداخلية “شكرا يا حكومة العجائب. شكرا على هذا الابداع الخارق ، فبغض النظر على أنه مخالف للمواثيق الدولية وللدستور وأبسط الحقوق، وأن فيه تمييز مضحك بين الصحافيين حسب قطاعاتهم، فإنه في العمق طعنة في الظهر لعشرات المئات من الصحافيين الشباب في الصحف الورقية والالكترونية الذين اعتقدوا أنهم في دائرتهم الإعلامية الصغيرة يقومون بعمل بطولي يستحقون عليه التنويه”.

دابا اليوم خرج المجلس الوطني للصحافة ببلاغ فيه ان الداخلية وافقات على خروج الصحافيين المهنيين ولكن بشرط. اييه دارو شرط. خاصك تكون مهني وعندك بطاقة الصحافة لهاد العام والاهانة هي ان الناشر خاصو يدير طلب للعمالة.

حنا ف”كود” يستحيل نديرو طلب لشي عمالة او شي ولاية. هادي تخربيقة كبيرة. علاش كتصلاح هاد البطاقة كاع ايلى كان خاصنا نتهانو ونقدمو طلب لشي جهة فالداخلية باش نخرجو. اذن نرفض هاد القرار.

العبث هو ان شي قايد مثلا دا شي صندوق التفاح لشي خضار او اتاهمو هاد الخصار بهاد الشي او لاح ليه الخضرة ديالو وبحضور العامل او الوالي خاصنا نتقدمو بطلب ليه نقولو ليه غاديين نفضحوك وعطينا رخصة.
كيفاش جريدة عندها عشرات المراسلين خاصها ترسل عشرات الطلبات لسوبرمانات الجدد. سوبرمانات يقودها وزير داخلية ولى كيدير خدمة كبر منو.

دابا خاص الصحافيين كلهم يتاحدو. خاص جمعيات حقوق الانسان وحرية التعبير ينوضو يناضلو ضد هيمنة الداخلية. هيمنة خطيرة جدا على مستقبل المغرب. هاد الشي لا يليق بمغرب اليوم. شوهة كبيرة لينا.